মাজবাটত মোক এৰি থৈ যোৱা ছোৱালিজনী
তোমাক ধন্যবাদ,
এঙেৰুৱা দর্পনখন সিদিনাই ভাঙিলো
য'ত প্রতিফলিত নহয় মোৰ জীৱন.....।।

ঠিকনা:

যাযাবৰীৰ ঠিকনা পৃথিবী,
মোক বিচাৰি তুমি
সন্ধ্যাৰ আকাশ নাচাবা,
তৰাবোৰ লুকাই থাকে দিনৰ পোহৰত
মোৰ যদি ঠিকনা লাগে
বৈ যোৱা নদীক চুবা.....।।

ডাকোৱালজনে মোৰ ঠিকনা নপঢ়ে
গাঁঠি দিয়ে মাথো ডাৱৰৰ পাখিত,
নৈ-পৰীয়া মিচিং ডেকাটিৰ বাঁহিত
সেয়ে ঐনিতমৰ সুৰ চেনেহৰ কনেঙৰ চিনাকি.....।।

যাযাবৰীৰ ঠিকনা পৃথিবী,
মোক বিচাৰি তুমি
সন্ধ্যাৰ আকাশ নাচাবা,
মলয়াৰ সতে মোৰ প্রেম আজীৱন....।।